Minggu, 22 Maret 2026 - DEBATA MANGALEHON TONDI HANGOLUAN

DEBATA MANGALEHON TONDI HANGOLUAN (Hesekiel  37:1-14)

Diloas Debata do bangso Israel tarbuang tu habuangan Babel, anggiat nian marhite habuangan i gabe ditanda nasida Debata, jala mulak muse tu Debata marhite hamubaon ni roha. Porsuk do panghilalaan nasida di habuangan i, maheu jala mandele. Nunga gabe holiholi na masak nasida di na tartaban i.

Adong dope sihirimon ni dohot tu holiholi naung masak i ? Adong !

Ditopot Debata do bangso i marhite panurirang Hesekiel. Ditogihon jala dipaulon do ibana di tongatonga ni rura na gok holoholi ni jolma na mate, na marrarahan di sisik ni rura i. Masak situtu do angka holiholi i (ayat 1-2).

Ise do tahe angka holiholi i ? Pinompar ni Israel do i, angka holiholi naung masak, naung pesan aroparop ni rohanasida jala naung pidom (ayat 11).

Tarpangolu dope angka holiholi i (ayat 3) ? Tarpangolu ni Debata do ! Patar ma i marhite na disuru Debata Jahowa si Hesekiel manurirangi tu holiholi i. Laos i do unok ni jamitanta, i ma:

Parjolo: Marhuaso do Debata pangolu holiholi naung masak i._ Di bagasan serep ni roha, dialusi si Hesekiel ma sungkun-sungkun i: Ale Tuhan Jahowa, Ho do umbotosa. Marhite alus i, dipatuduhon si Hesekiel do panandaonna, na so tau ibana patupahon manang aha, ia so Debata na jumadihonsa.

Gabe manurirangi ma si Hesekiel dompak angka holiholi naung masak i: Ale holiholi na masak i, tangihon hamu ma Hata ni Jahowa.

On ma panurirangion na parjolo: Manurirangi tu angka holiholi naung masak i asa ditangihon nasida Jahowa. Debata do mangalehon tondi tu nasida (holiholi i) asa mangolu (ayat 4-5). Boha dalanna ? i). LehononNa angka uraturat di nasida. ii) PatubuhononNa ma  sibuk di nasida. iii) Bahenonna ma nasida marhulinghuling, asa ditanda nasida Jahowa (ayat 6).

Holiholi naung masak i, i ma bangso na marbalik sian Debata jala na so manangihon HataNa. Mangula pe nasida jala marrodi, tuanna nama na marsaulihonsa. Nunga homur matananasida hinorhon ni iluilu, arsak dohot holso na so marnosan. Gabe marserak manang marrarahan bangso i, ndang adong be pardomuan ni na sada dohot na sada nari.

Paduahon: Debata do padomuhon dohot pasadahon angka na marserak i._ On ma panurirangon paduahon: Panurirangion tu sada soara na marngongos. Aha ma na masa disi (ayat 7-8) ? i). Masitopotan ma angka holiholi ganup tu donganna. ii). Marurat ma nasida jala tubu sibuk jala leap hulinghuling di atas nasida (kulit menutupinya).

Tuk do huaso ni Debata pangoluhon holiholi naung masak i. Adong do holiholi ni pat, tangan, jari-jari, ulu nang angka na asing. Alai ndang mardomu na sada tu na asing, ai soada uratna padomuhon, manang sibukna dohot mudarna. Hata ni Debata do padomuhon holiholi naung marrarahan i, marhite na mambahensa gabe marurat, marsibuk jala leap marhuling-huling. Gabe masitopotan ma angka holiholi i ganup tu angka donganna.

Patoluhon: Tarpangolu Debata do angka holiholi gabe marhosa jala martondi._ On ma panurirangion patoluhon: Ala ndang adong dope tondi di bagasan nasida, gabe manurirangi ma muse si Hesekiel patoluhalihon: Ro ma ho ale tondi, mangullus ma ho tu bagasan halak na binunu on, asa mangolu. Gabe mangolu ma nasida, diojakhon ma patnasida gabe parduaan parangan na bolon sahali (ayat 9-10).

Marhuaso do Debata pangoluhon na mate. Di na marngongos soara i, masitopotan ma  angka holiholi i. Gabe tubu ma nang uratna, dohot sibukna jala leap tahe nang hulinghulingna. Holan Tondi do na tuk pangoluhonsa. Songon di panompaon, dung pe diullushon Debata hosa hangoluan i gabe martondi na mangolu ma bangso i (pat. 1 Musa 2:7).

Paopathon: Debata do Mangungkap tanoman ni BangsoNa._ On ma panurirangion na paopathon: Jahowa do mangungkap tanomannasida huhut mamboan nasida nangkok sian tanonmannasida jala manogihon nasida mulak tu tano Israel (ayat 12). Gabe tandaonnasida ma Jahowa naung mangalehon Tondina tu nasida asa mangolu huhut marhasonangan di tano nasida (ayat 13-14).

Mangula do Tondi ni Debata pangoluhon panghirimon ni jolma na porsea. Uju dao huhut sumisi panghirimon ni jolma, ndang gabe laos mandao Debata. Tung so dipasombu Debata do jolma i mate so marpanghirimon. Jahowa do mandok: Ida ma, Ahu mangungkap tanomanmu. Tartanom do bangso i di toru ni huaso ni bangso Babel na marhatobanhon nasida.

Alai ndada holan mangungkap tanoman i tahe Debata, alai huhut do mamboan bangso i mulak tu tano Israel (ayat 12). Nang pe dipasahat Debata bangsoNa tu tangan ni parbegu, alai hot do parnampunaonNa di bangsoNa. Debata sandiri do paluahon huhut manogihon mulak bangso naung tartanom di habuangan Babel i. Debata do Jahowa. Sian habinsaran dohot hasundutan,  ndang adong Debata dunghon ni Ibana (pat. Jes 45:4-6).

Hehe ma angka holiholi na masak. Marhasadaon ma angka naung marserak hian jala masitopotan.  Pangoluon ni Debata ma hita marhite TondiNa, asa hita pe gabe marroha pangoluhon ma. Amen !