JAHOWA DO MANOGU HO !
(Jesaya 42:1-9 Minggu 11 Januari 2026)
Tapuji ma Tuhanta ! Nunga taripar hita tu Taon Baru 2026 dohot tu Minggu Epiphanias: Munggu hapapatar di hita patuuhon naung tutu situtu tubu Kristus di roha nang ngolunta.
Lam patar ma nang apulapul ni Debata tu torop ruas nang rakyat nidondonan ni bencana Sumatera, pola lobi 1100 agoan hosa asing ni angka na mago dope. Mandate nasida patureture bagasnasida, agoan jabu, hauma dohot na asing. Disingkati Tuhanta ma luhutna i !
Tumandi sian i ma panghilalaan ni bangso Israel na tarbuang tu Babel. Nunga tung songon hau na tinaba bangso i. Ditaban do hurang lobi 4000 halak baoa na magodang, angka na pistar, na sangap, malim dohot angka pande. Molo dietong dakdanak dohot boru-boru, marasam 15000-20000 ma nasida tarbuang lelengna 70 taon.
Di ngolu si songon i, ro do bagabaga haluaon sian Jahowa huhut pahothon padanNa. Diapuli Debata do nasida, huhut dijouhon, asa unang ganggu roha nasida, ai Debata do manogu nasida.
Ganggu do roha ni bangso i, tutu do ulaning nasida mulak tu Jerusalem ? Molo mulak pe, dia ma tano siulaon nasida di huta naung magargar i ? Ganggu do nasida di masa depan na so tontu. Unang mabiar mamereng tu jolo. Unang ma marsigantung tu pudi. Songon panghahap i, nunga jumolo gurbak simajujungna, gabe humordit, jala mulak mamboan laporan palsu. Manang songon pardihuta ni si Lot, sai lohot manatap tu pudi, ujungna gabe batu sira, ndang tarbahensa morot.
Nunga ro bagabaga ni Debata. Na ro do naposoNa mamboan las ni roha dohot hatuaon tu nasida. NaposoNa na tinoguNa, na pinillitNa, na ginohan ni TondiNa jala hasudungan ni rohaNa i, tariashononNa do uhum na sintong jala mamolin tu sude bangso. Debata na Inklusif do Ibana. Ibana do Mesias, NaposoNa, Anak ni Debata (pat. Mrk 1:10-11; Mat 3:16-17; Luk 3:22; Joh 1:32-34).
Angka raja di portibi on, manariashon haputusanna di tonga-tonga ni angka alaman. Dipalu do tingting marhite-hite angka paranganna, asa sude halak na umbegesa tunduk tu haputusan i. Halak na so unduk tu haputusan i, ingkon mate gosaonna jala bunuonna.
Alai, ianggo naposo ni Debata, ndang pola joujou manang marngiar patubege soarana di angka alaman (ayat 2). Ndang pamer kuasa ibana (show force) mandalanhon uhum dohot hasintongan. Hombar tu hasintongan do tariashononNa uhum i. Dia ma i ?
Arung naung marosak i ndang laos ponggolhononNa (buluh yang patah terkulai tidak akan diputuskan). Halak naung marosak ala penjajahan, na marosak ateatena binahen ni dosa i, ndang laos ponggolhononna; pamalumonna do asa gompis.
Sumbu na marnehet-nehet i, na so haru torang sinondangna, ndang laos intopan (sumbu yang pudar nyalanya tidak dipadamkan). Gariada, lam pagalahonna do asa lam marsinondang (ayat 3). Nunga mago sinondang ni bohi ni naposoNa di habuangan, alai dihehei Debata do asa tongtong marsinondang.
Unang mandele manang mabiar hita jumpa mellepellep sinondang ni bohinta, manang jumpa mellepellep ekonominta be. Angka na mellepellep pe, molo disondangi Debata gabe tiur do muse. Jesus Wants Me for a Sunbeam, ninna ende na uli na nirongkom ni Nettie Talbot, mandok: Naeng marsinondang ngolungku, diigil Jesus i. Manang didia pe ahu tongtong huingot i. Tiur marsinondang, i do niigil ni Jesus. Tongtong marsinondang, panondang do au tutu.
Kristus do Panondang ni portibi on. Jolma na mangolu di bagasan Ibana, sai marsinondang do i di haholomon (Joh 8:12). Hita nang huriaNa songon naposoNa, hobas ma mangolu di bagasan hatigoran padirgak angka na maheu, pahinsat parngoluon di sude gulmit ni parngoluon.
Ndang olo loja ibana manang mandate paima dipahot uhum hasintongan (ayat 4), jala angka pulo manghalungunhon patikNa. Gabe naposo ni Debata na tongtong marsinondang ma hita. Molo mintop sinondang i, mandosdos ma saluhutna. Angka na lumlam i pe, hira na uli nama i idaon.
Sinondang i do dalan di hita mangaradoti langit na pinaherbang ni tanganNa, mangaramoti tano na pinajararNa, songon i mangaradoti angka suansuanan rodi angka na tubu di atasna (ayat 5). Marroha pangoluhon jala paluahon ma hita, huhut siboan hamalumon tu angka na mapitung, na tarhurung ro di angka maringan di haholomon (ayat 7-8). Taulahon ma saluhutna i di marhite panogunoguon ni Debata di hita. Amen !
