SUDE DITOMPA DEBATA MARHITE KRISTUS
_(Ev. Kolosse 1:15-20; Ep. Psalm 148:1-14)_
Selamat minggu di hita saluhutna, minggu Ekologi di sandok hurianta HKBP sadarion.
Kolosse i ma sada kota di Asia na metmet di timur Efesus, sada ibukota provinsi di Asia na metmet uju i. Ndada apostel Paulus na pajongjong huria on. Alai, dipaborhat ibana do tusi angka pangula, ai dietong do i songon tanggungjawabna laho pauliuli huria i.
Ndang mansadi apostel i tumangianghon huria Kolosse, arian nang borngin. Ulinai molo pangula rap masitangiangan dohot ruasna (Martin Luther ditangianghon ruas). Samalomalo ni pangula, molo so ra huria i tumangianghonsa, mangopo do niulana; alai molo hurang singkop pe ulaonna, alai nunur ditangianghon ruasna, marnidok situtu do i (pat. Justin Sihombing; ay 9-10).
Tarbarita do uli ni ngolu parhuriaon nasida. Tarbarita do nang toras ni haporseaon, parbue ni holong nasida suang le di dihahohot nasida marpanghirion tu Tuhanta. Sai unang ma hita tarbarita ala hamamagonta, ala manangko, korupsi, manang parmabuhon rupani.
Angkup ni i, dibege jala diboto si Paulus do na masa di huria i marhite si Epafras. Songon informan na denggan jala akurat, objektif do si Epafras pasahat barita. Dipaboa do partumbur ni parpoda na lipe disi, isara ni Gnostik mistisisme, na mandok Jesus na tarsilang i, sahalak na tudos tu bohiNa do, alai muba sanghidop mata.
Didok dope tahe, ia Jesus i na tinompa do, hape saluhutna do ditompa di bagasan Kristus. Ibana do parmulaan ni saluhut huhut suman ni Debata. Tung na so jadi sombaon nasa na tinompa ni Debata, angka tondi na mangarajai dohot na mamarenta portibion rap dohot pangisina. Sude poda na lilu i, naeng paorothon haporseaon nasida do sian Jesus.
Ibana do suman ( ‘Eikon’: “gambar”) ni Debata na parjolo tubu sian nasa na tinompa _(yang sulung, lebih utama dari segala yang dicipta; ayat 15)._ Hata ‘Eikon’ on, patuduhon hinabalga ni huasoNa, gombaran na sempurna, na so adong gombaran na asing di portibi on dunghon ni Jesus i. Alani i, ndang adong dalanna ganggu hita di ha-DebataonNa.
Marhite sian Ibana do ditompa saluhutna, na di banua ginjang dohot na di tano, na tarida dohot na so tarida, angka habangsa, harajaon, angka gomgoman, angka parhuasoon (ayat 16). Gari angka surusuruan, na tinompa do na ingkon marsomba tu Ibana; ndada sisombaon (Kol 2:18).
Di jolo ni saluhutna do Ibana, jala saluhutna i do hot di bagasan Ibana _(Ia ada terlebih dahulu dari segala sesuatu dan segala sesuatu ada di dalam Dia;_ ayat 17). Lapatanna: na manongtong do Ibana, hian nang nuaeng. Nunga adong hian Jesus andorang so ojak dope portibi on. Ibana do tahe parmulaan ni sandok portibi on.
Ibana do Ulu ni daging i, i ma huria i, na pajongjonghonsa jala nampunasa. Ibana do na parjolo _(yang sulung)_ tubu (“bangkit”) sian angka na mate (ayat 18). Ibana do patujolo ni haheheon. Dibahen i, angka na mate pe, hehe do di bagasan Jesus. Ibana do pusat nasa gulmit ni ngolunta, huria i nang sandok na tinompa.
Di Silang i do dipatupa pardamean di na saluhutna. Silang i, ndada holan na ringkot tu jolma i, alai huhut do mamboan ‘harmoni’ tu sandok kosmik na tinompa naung sega. Nasa hagogok ni Debata maringan do di bagasan Ibana (ayat 19), pusat ni nasa parngoluon; ndada holan sambariba. Debata na mangibul do Ibana, ndada satonga Debata.
Minggu Ekologi do di HKBP sadarion. Tumatangis, hansitan do mangae alam semesta, lam sega secara bertahap. Masa banjir bandang, erosi, pencemaran lingkungan nang udara pe. Ganup taon hurang lobi 100.000 km persegi ma tombak dibabat. Ganup ari tolu jenis spesies suansuanan jala sada spesis fauna punah. Di hutanami pe, nga maol luluan isara ni hirik, sikke, huridap, sipaitok nang palatima. Lam moru ma aek na tio, lam sumurut ma mutu ni aek di tano, di tao, di sunge nang di laut.
Nunga jotjot lupa jolma i, gabe mangarajumi dirina songon raja padoha mangarajai portibi on. Hape, dipasahat Debata do i tu hita laho ulaonta jala ramotanta (1 Musa 2:15: “avad” dan “syamar”). Na dua pandohan on masirainan do tu “ibadah” patudu tanggungjawab dohot pengabdian.
Mangarajai (1 Musa 1:26 “radah”: ‘berkuasa’), ndada laho mangeksploitasi bumi, alai mangaradoti jala mangaramoti do, tudos tu peminjam dengan hak pakai manang panumpang tanpa bayar. Malua ma portibi on sian parhatobanon ni jolma na mongkus mansuasaehon bumi. Gari cacing ingkon radotan asa mangolu pagabur tano asa gabe produktif (Jes 41:15-16; Poda 30:15-16).
Adong do parsiajaran *Penyataan Umum* mandok, tandaonta ma Debata marhite nasa na tinompa (pat. BE. 569). Saluhutnai ditompa di bagasan Kristus. Ndang adong na sala na tinompa ni Debata; sude do denggan. Gari jarak ni Mataniari pe tu angka planet nunga sian pangaturhononon ni Debata.
Pujionta ma Debata secara universal, angka parangan, surusuruan, langit, aek, tano, pahanpahanan, angka raja, bangso, panguhum, dolidoli, na marbaju, na bajar nang natuatua (Psalm 148:1-14). Luhut parangan parbanuaginjang, angka na tinompa di portibi ro di angka jolma, rap ma mamujimuji Debata. Tu ulina ma portibi, jabu “oikos” na taingani on, inganan ni nasa jolma dohot nasa na tinompa, dao sian ragam ni bencana.
Molo sega portibi, boha ma bahenon ni langit marsomba, molo ragat polusi nang asap pabrik ? Boha ma laut marsomba, molo gok sampah, plastik, botol kemasan ? Boha ma tombak marsomba molo sai ditabai jala ditutungi ?Sega ma nang ekosistem dohot rantai makanan, ai nga umbalga bagudung tu huting, diallangi jolma dope tahe dohot ulok gabe tambul ni sangsang.
Tapuji ma Debata marhite na merawat bumi rodi nasa na tinompa, langit, alogo, ombun, dolok-dolok, sunge, bondarbondar, laut, tombak. Suan jala patubu ma angka hau, pauli pargodungon ni gareja, suan bunga di alaman, songon keterlibatan ekologista ganup marsadasada. Amen !
