HOT DO ASI NI ROHA NI JAHOWA SALELENGNA !
(Ev. Mazmur 103:15-18)
Selamat minggu ma di hita saluhutna. Dijouhon Minggu on do tu hita, paboa hot do asi ni roha ni Jahowa ro di salelenglelengna.
Psalm 103 on, i ma pujipujian ni bangso Israel ala asi ni roha ni Debata dung mulak nasida sian habuangan Babel. Ndang tarpangasahon nasida gogona sandiri dohot gogo ni bangso na humaliang. Ndang tarpangasahon hape tutu balga ni botohon, gogo, huaso dohot na adong di hita. Marhite turpuk Jamita on, dijouhon do tu hita asa:
Parjolo: Pangke ma partingkian na jompok i sadenggandenganna tu angka ulaon na marguna (ayat 15). Alani aha ? Ai songon duhutduhut do ariari ni jolma na gale i, marbunga songon bunga di ladang. Songon duhutduhut, satongkin do mangerbang, dungi malos. Mangerbang manogotma, marurus botarina. Saluhutna do martiti, hombar tu musim semi, musim berbunga, manang musim rontok/gugur.
Tudos tu duhutduhut na di ladang do ngolu ni jolma i, parsatongkinan jala sangombus. Hira na marbungaran idaon satongkin, alai pintor malos do ditipa las ni ari. Luhutna gogo, arta, hasangapon, sinamot, huaso, jabatan, pangkat, satongkin do i, martiti jala periodik (pat. Sahalak parpangkat na timbo, di gedekgedekna do tongkat jabatan, tegap, alai di tingki na asing sumurut do i, ditogugotu dung suda huaso dohot gogona, jala ndang nirimpu ibana i).
Alai nang pe laho salpu, ndada asa mandele, pesimis jala tahuton ma hita so pola mangula. Gariada, pangkeonta ma tingki i sadenggandengganna asa unang salpu so adong legacy na tatadinghon. Unang laos salpu ngolunta, so adong sitiopon, manang siingoton, so sanga tabahen na denggan disi. Molo didok Gajah mati meninggalkan gading, harimau mati meninggalkan belang, manusia mati meninggalkan cinta, kasih, legacy, perbuatan baik, dll.
Paduahon: Nang pe ro alogo na gogo, hot ma togu haporseaonta. Di ayat 16 didok: Ai dibolus alogo ibana, jala ndang disi be, jala ndang tartanda be ingananna i. Ngolu parsatongkinan on, boi do i diullus alogo. Hilang jejak, hilang tanpa bekas, mago satongkin, ndang adong tandatanda (pat. uap, es, ombun). Songon alogo do ngolu parsatongkinan i, diullushon tusan manang tuson, mubauba do sude, ndang adong na hot.
Satongkin do ariari ni jolmai di hasiangan on, intap ni 70 taon manang dieak 80 taon (Psalm 90:10). Jala hinadengganna i ma hangaluton dohot halojaon. Molo marulangtahun hita, las do roha tamba umur, alai laos moru do sada taon sian ariari ni ngolunta. Martiti do ngolunta songon sorha ni padati. Satongkin di ginjang, tongkinnari nunga ditoru. Satongkin di jolo, tongkinnari nunga di pudi. Satongkin di istana dipajagar, tongkinnari nunga di penjara.
Molo didok ndang tartanda be ingananna i, lapatanna sude na adong di hasiangan on, marujung do i, salpu, mago so binoto. Sangombus do ngolu i, songon pangullus ni alogo. Molo alogo, lomona do ro, sian dia jala lao tudia. Ndang taroraan harorona, ndang haotapan. Na mangullus do alogo i satongkin tuson, satongkin tusan, tongkin manghabanghon, tongkinnari pasonggophon, songon i ma ngolu on, mubauba jala ndang marhahotan.
Mangullus do ibana, nang so taida. Nang pe ro alogo, unang marumpak ngolunta. Alai songon bambu ma, hot jala togu. Marende tahe nasida begeon mardoropdorop, alai hot.
Antong dia do ojahan na hot ?
Patoluhon: Asi ni roha ni Jahowa do na hot salelenglelengna. Dijou do hita asa unang lalap di angka parsatongkinan i, alai na ummangat asa taapaadop jala tasobokhon do dirinta tu hatongtongon ni asi ni roha ni Jahowa sian salelenglelengna ro di salelenglelengna. Manongtong do hatigoranna, marnini jala marnono. Mabiar ma hita mida Debata, marhite na mangulahon hatigoranna, na manongtong i.
Holan asi ni roha (“khesed”) ni Jahowa do na hot ro di salelengna. Ido pos ni rohanta di ngolu parsatongkinan na sementara jala fana on. Mangolu ma hita di bagasan pangoloion, di padan (“covenant”) dohot di patik ni Debata, ai i do sulu dohot togutogu di hita mangula ulaonta dohot mandalani ariari ni ngolunta. Panghilalahononta ma tongtong asi ni rohaNa na so mansohot i, molo satia hita mian di padanNa dohot di angka patikNa i. Amen !
