_Renungan Minggu Trinitatis, 15 Juni 2025:_
*TINGTINGHON TAON PARASINIROHAON NI JAHOWA*
_(Ev. Jesaya 61:1-9)_
Buku Jesaya bagian na patoluhon (Trito-Yesaya) on, mangondolhon haluaon ni bangso Israel sian habuangan Babel, naung maheu diparhatoban 70 taon lelengna. Ndang tiala be roha nasida manghoihon holsona, ai ndang adong be suraon halak na ra tumangihon sitaonon nasida, marsingkor diparhatoban huhut parir marparniahapan.
Disuriranghon panurirang Jesaya do na songgop tondi ni Tuhan Jahowa huhut mamiahi naposoNa (ayat 1). Tondi ni Jahowa do na patauhon angka panurirang i mangula ulaonna, mangajari nasida mandok sidohononna huhut margogoihonsa patolhas tona ni Debata. Songon i do Kristus patupa panghobasionNa di portibi on (Mat 3:16). Ndada sian dirina sandiri songon jolma Ibana mangula ulaon i, alai Tondi i do “legitimasi ilahi” di Ibana laho patupa ulaon panghobasionNa.
Kristus do hagogok ni panurirangion i, ai didok Jesus do: _Sadari on do jumpang na tarsurat ondeng…”_ (Lukas 4:18-21). Na ro do Ibana mamboan barita na uli tu angka na pogos, na dangol, parroha na bojok (“remuk hati”) jala na maheu (Mat 25:34-40), ro di angka na mapitung. Agan pe mapitung, alai tiur do mata ni roha nang haporseaonna, marnida tangan ni Debata na tongtong satia mamasumasu.
Debata do ojahan ni nasa transformasi di taon parasinirohaon on. Angka dia ma transformasi parngoluon i na pinatupa ni Debata di bangsoNa i ?
_Parjolo: Gabe tumpal harajaon ni Jahowa_ (ayat 3-4). Na marsak gabe hinsa, manjalo tumpal singkat ni sirabun, miak las ni roha singkat ni arsak ni roha, ulos na marhadohoan singkat ni tondi na tahuton. Na tartaban hian hinsat pauli naung tarulang huhut pajongjong jala paimbaruhon huta na tartaban i. Bangso naung halongonan hian dipauba gabe hasoloan ni rohaNa, naung tinadinghon hian gabe marharajaon (“bersuami”).
_Paduahon: Angka bangso parbegu marnida hatigoran dohot hamuliaon ni Debata_ (ayat 5-6). Bangso na pinarhatoban naung matemate ne jala mintop, gabe binsar di bagasan hatigoran. Di parhatobanan i, idaon ni parbegu ma hatigoran ni Debata jala angka raja marnida hamuliaonNa. Ndang na talu hape Debata disi. Na diloas do hape bangso i tarbuang, asa dohot angka parbegu mananda Debata. Na tungki gabe dirgak, roha na magopu jala nidondonan soluk gabe las ni roha.
_Patoluhon: Hatoban gabe tuan._ Muba ma status ni hajolmaon disi. Angka hatoban na asing mangula di nasida, halak ruar gabe marmahani dorbiana, angka anak ni halak sileban gabe pangula jala tukang porlak anggurna (ay 5). Ndang hatoban be nasida, alai bangso naung pinalua do, jala digoar gabe Malim ni Jahowa jala parhalado ni Debata. Sinamot ni parbegu gabe panganonnasida, hasangapon ni parbegu gabe soluhon nasida huhut gabe nampuna nasida. Andungandung muba gabe pujipujian, arsak gabe olopolop, hageduhon morot tu bagasan hatigoran.
_Paopathon: Tano nasida pe marlas ni roha Silompit parbuena._ Ndada holan jolma i mangolu, gari tano pe nunga marharajaan (bnd. “bersuami”) diramoti Debata; ndada tano jalang na so marnampuna (Ibr. “tano: “nakhalah”: milik kesayangan). Tano i pe, marparbue ma gabe habaoran ni pasupasu hombar tu hatigoran ni Jahowa, asa dao jolma i sian hapogoson nang na anturaparon. Debata mamasumasu nasida sahat ro di pomparan nasida marsundutsundut (ayat 9).
Marhite turpuk on, dijou Debata do hita gabe ulaula di tanganNa patupa transformasi parngoluon i huhut maningtinghon Taon Parasinirohaon ni Jahowa, i ma:
_Parjolo: Baritahon Barita na uli tu halak na dangol/pogos (‘Sengsara’)._ Gabe parbarita nauli ma hita tu angka na pogos, na lea, tu angka na olo pauba roha, angka na pogos tondi, tu angka na naeng partohap di haluaon dohot hatuaon ni Debata.
_Paduahon: Pauliuli halak parroha na bojok (Merawat orang-orang yang remuk hati)._ Gabe Pandaoni ma hita mamboan apulapul dohot hamalumon tu angka na marsak, na marsahit, angka pardosa, na lea ala hasalaan dohot hahuranganna. Laos baritahononhon ma dison ari partubolan ni Debata tu saluhut na manindos bangso haholongan ni rohaNa, ala ni angka pambahenan na so uhum dohot na nirupa ala ni hasintongan (Mat 5:10; Rom 12:17-19). Gabe pangapuli ma hita mamboan panghirimon tu angka na mandele.
_Patoluhon: Gabe siboan haluaon tu angka na tarhurung dohot na tarrante (“tertawan, terpenjara”) dohot na ginosagosa (“tertekan dan tertindas”)._ Marroha paluahon ma hita, tu angka na tarhurung, angka na pinarhatoban ala ni uhuman, na pinarhatoban alani utang (pat. pinjol), kredit ala so tuk manggarar utang tu angka sionsop mudar (Jes 42:7) ), ro di ragam habuangan di parngolu on (3 Musa 25:1-34; 5 Musa 15:1-18). Tung na so jadi adong be na mangae di tonga-tonga nasida. Ingkon malua ma sude hatoban manghalashon taon parasinirohaon ni Debata. I do haluaon na binoan ni Kristus tu sandok portibi on. Amen !
_Pdt Banner Siburian/br Siagian_
Medan
