RIMPAS JALA HOBAS TU NASA ULAON NA DENGGAN
(2 Timotius 3:10-175)
Surat 2 Timotius disurat Paulus uju tarhurung ibana taon 66-67 SM di panggomgomion ni Kesar Nero. Dangol situtu do dihilala ibana di sel tahanan bawah tanah i, tarrante jala ngalian (2:9; 4:13). Dihilala ibana gira nama tingkina di ngoluna paujung parlojongon ni haporseaonna. Nunga ditatap naung rade tumpal silehonon ni Tuhan i tu ibana (4:6-8).
Di parsirangguton haporseaon i, dipaingot do si Timotius, paboa ngolu ni sisean ni Kristus ndang sai mura, boi do ro hamaolon, haporsuhon nang pangaleleon. Dipopai ma ibana, asa ihuthononna ma apostel Paulus marhite angka podana, di parange, di tahi, di haporseaon, di lambas, holong, benget ni roha di pangaleleion nang haporsuhon (ay 10-12).
Hata ni Debata do gogo di angka na porsea patupa transformasi asa rimpas jala hobas tu nasa ulaon na denggan. Marhuaso situtu do Hata i laho manopa karakter ni hajolmaon, mananda hahurangan, jala mangajari hita gabe parsintong.
Antong, songon dia ma hita boi gabe rimpas jala hobas tu nasa ulaon na denggan ? Marhite turpuk on, dijouhon do tu hita:
Parjolo: Adopi haporsuhon i marhite ngolu na mangihuthon poda na tur marurat tu Hata ni Debata (ayat 10-11). Mangihuthon (Yun. Parekolouthesas-parhkolouqhsaz) marlapatan: Marsitutu mangihuthon, ndada holan mamoto, alai gomos manggolom haporseaon di tonga ni pangaleleon nang haporsuhon. “Nang godang pe haporsuhon, sai benget do ahu manaon, sai ihuthononku Jesus salelenglelengna I” (BE. 698).
Marhite i ma margogo hita pasiding angka jolma na impolan di perak, parhata manggang, parroha haginjangon, panginsahi, na so mangoloi natorasna, na so marningot lagu, na tois, pangoseose, panihasnihasi, parmurukmuruk, parjehe, parroha na neang, sipaburnang diri, na holongan di hisap ni daging dohot na asing (ayat 2-4).
Paduahon: Daulat Marparage di bagasan Kristus (ay12: Eusebwz en crisqw – Eusebos en Kristow) jala marurat ma hita di Hata ni Debata. Agan pe ndang sai mian di bagasan hasonangan ngolu ni angka na daulat roha (parsintong), alai tuk do nasida mangalo hisap-hisap ni portibi on, huhut pasiding jala manirang dirina sian i. Molo dihapogani parjahat dohot siula utiutian pe hamagoanna, na paotootohon do nasida jala dipaotooto (ayat 13).
Ndang kebetulan hape haporsuhon dohot pangaleleon adopan ni jolma na daulat roha, ai bagian na so tarsirang do i sian gulmit ni ngolunta. Ndang tadinghonon ni Debata hita di ragam ketimpangan sosial, diskriminasi, pangeleleon, intoleransi, panginsahion, anggiat lam benget rohanta, marhatauon jala marsihohot manghirim (Roma 5:3-4).
Patoluhon: Mian di bagasan angka naung ginuruhon jala naung nihaporseaan (ayat 14). Mian (Yunani: Mene – Mene), lapatanna: “berpegang teguh pada kebenaran”; “tinggal”, “tetap berada di dalam”. Mian di bagasan dia ? Di bagasan “Hata na Badia i “ (ayat 15: ta grammata – ta grammata), asa taruli hita di haluaon marhitehite Kristus Jesus.
Luhutna Surat i, sinihathon (Qeopneustoz-Theopneustos) ni Debata do (ayat 16). Ndada surat nirongkom ni jolma, alai sian Tondi ni Debata do; ndada sian malomalo ni jolma, alai sian huaso ni Debata do, na marhuaso pauba roha, parange dohot ngolunta.
Na hasea (bermanfaat) tu dia do nasa Surat i ?
i) Mamodai (mengajar; didaskalian – didaskalian). Gabe mamoto ma hita dia ma hasintongan ni Debata, dia na lipe. Laos boanonNa ma hita tu ngolu na sintong di adopan ni Debata.
ii) Maminsang (“Menyatakan kesalahan”; Elegcon- Elegxon). Dipatudu hasintongan i ma hita naung manimbil sian dalanNa, gabe mananda hita di angka dosa nang hahuranganta, dung i paubahon roha asa bongot hita manghangoluhon hasintongan ni Debata.
iii) Pauliulihon (“memperbaiki kelakuan”; “correction”; epanorqwsin) – epanorthosin), paubahon roha asa morot, mulak jala bongot huhut mamarangehon hasintongan ni Debata. Gabe hot ma jongjong jolma i di hasintongan, ndang tartading di pangalaho na robi.
iv) Manogunogu jolma di hatigoran ni Debata (thz dikaiosunhz – tes dikaiosunes). Gabe karakter ma manghangoluhon hatigoran hombar tu hatigoran ni Debata.
Tujuan ni saluhutna i ima asa rimpas halak ni Debata, hobas tu nasa ulaon na denggan (ayat 17). Hobas (“diperlengkapi”, “dedicated”), paboa ditopa Debata do hita marhite ragam haporsuhon dohot pangaleleon i tu nasa ulaon na denggan. Pangaleleon manang haporsuhon, gabe “kairos” do i sian Debata dalan pa-tang-hon haporseaonna.
Nasa ulaon na denggan na taula, ingkon na nionjar jala siniraan ni Hata ni Debata do. Ingkon Hata ni Debata do suhatsuhat ni nasa ulaon na denggan na taula. Jala holan Hata ni Debata do patau hita patupahon nasa ulaon na denggan. Amen !
Pdt Banner Siburian/Siagian
Medan
